پدماوتی اس لیے دیکھی جائے گی کہ اس میں کیا کیا نہیں ہے

تو متنازع ہندی فلم پدماوتی آخر ریلیز ہونے کو ہے اور لوگ خود سنیما ہال میں جاکر یہ دیکھ سکیں گے کہ اس فلم میں رانی پدماوتی کے ساتھ علاؤالدین خلجی کا کوئی ’ڈریم سیکوئنس‘ نہیں ہے۔

یہ تاریخ کی پہلی فلم ہوگی جسے بہت سے لوگ صرف اس لیے دیکھنے جائیں گے کہ اس میں کیا کیا نہیں ہے۔

مثال کے طور پر دلی کے سلطان علاؤالدین خلجی کو رانی پدماوتی سے محبت ہوئی تھی کہ نہیں اور اگر ہاں تو کیا رانی کے دل میں بھی۔۔۔ بس یہاں سے آگے آپ خود سمجھ لیجیے۔ اور کیا اس بارے میں خلجی یا پدماوتی یا کسی اور نے کوئی خواب تو نہیں دیکھا تھا؟

اگر دیکھا تھا تو یہ رانی کی توہین ہوگی اور راجپوت اپنی رانیوں کی توہین برداشت نہیں کرتے۔ بھلے ہی مورخین انہیں یہ سمجھاتے سمجھاتے تھک گئے ہوں کہ رانی پدماوتی صرف ایک کہانی کا کردار تھیں، اصل تاریخ میں ان کا کہیں کوئی ذکر نہیں ملتا۔